ಜಿಯೋ ಜಾಣತನ ಮತ್ತು ನಮ್ಮ ಮೂರ್ಖತನ

ಆಧಾರ್ ಮಾಹಿತಿ ಸೋರಿಕೆ: ಜಿಯೋ ಜಾಣತನ ಮತ್ತು ನಮ್ಮ ಮೂರ್ಖತನ

April 1, 2017

ಕಿರಣ್ ಎಂ ಗಾಜನೂರು

ಆಧಾರ್ ಮಾಹಿತಿ ಸೋರಿಕೆಯಾಗಿದೆ ಎಂದು ಖುದ್ದು ಸರ್ಕಾರ ಒಪ್ಪಿಕೊಂಡಿದೆ. ಈ ತಪ್ಪೊಪ್ಪಿಗೆ ಪಶ್ಚಾತ್ತಾಪದಿಂದೇನೂ ಮಾಡಿಕೊಂಡಿದ್ದಲ್ಲ. ಅದರಲ್ಲಿ 'ಮತ್ತೇನು?' ಅನ್ನುವ ಧೋರಣೆ ಸ್ಪಷ್ಟವಾಗಿ ಕಾಣುತ್ತಿದೆ. ಈ ನಡುವೆ ಇಂಡಿಯಾದ ಶ್ಯಾಡೋ ಸರ್ಕಾರ ಎಂದೇ ಪರಿಗಣಿಸಲಾಗುವ ರಿಲಯನ್ಸ್ ಕಂಪನಿ ಜಿಯೋ ಸಿಮ್ ಮೂಲಕ 6 ತಿಂಗಳು ಪುಕ್ಕಟೆ ಡಾಟಾ ನೀಡಿ ಲಕ್ಷಾಂತರ ಜನರ ಆಧಾರ್ ಮಾಹಿತಿಗೆ ಕನ್ನ ಹಾಕಿದೆ. 

ಜಿಯೋ ಡೇಟಾ ಫ್ರಿ ಕೊಟ್ಟು ನಿಮ್ಮ ಆಧಾರ್ ಮಾಹಿತಿ ನಮ್ಮ ಒಪ್ಪಿಗೆಯಿಂದಲೇ ದೋಚಿದ್ದು ಮಾತ್ರ ನಮಗೆ ಕಾಣಲೇ ಇಲ್ಲ! ಜಿಯೋ ಸೀಮ್ ಆಧಾರ್ ಕಾರ್ಡ್ ಹೊರತಾಗಿ ಬೇರೆ ದಾಖಲೆ ಒಪ್ಪುವುದಿಲ್ಲ. ನಾವು ಬೆರಳಚ್ಚು ಒತ್ತುವ ಮೂಲಕ ಸ್ವತಃ ನಮ್ಮ ಆಧಾರ್ ಮಾಹಿತಿಯನ್ನು ಬಳಸಿಕೊಳ್ಳಲು ಅನುಮತಿಸಿದ್ದೆವು. ಒಂದು ಫ್ರಿ ಡೇಟಾ ಆಫರ್ ಹೆಸರಿನಲ್ಲಿ ದೇಶದ ಶೇ 60 ರಷ್ಟು ಜನರ ಆಧಾರ್ ಮಾಹಿತಿ ರಿಲಾಯನ್ಸ್ ಕಂಪೆನಿಯ ಪಾಲಾಗಿದ್ದು ಗೊತ್ತಾಗಲಿಲ್ಲ ನೋಡಿ ನಮಗೆ! ಆ ಅರ್ಥದಲ್ಲಿ ನಾವು ಹೆಬ್ಬೆರಳು ಒತ್ತಿ ಮಾಹಿತಿ ಕೊಟ್ಟ ಆಧುನಿಕ ಅನಕ್ಷರಸ್ಥರು!

 

ಸರಳವಾಗಿ ಇಷ್ಟೆ... ನೀವು ಜಿಯೋ ಸಿಮ್ ಪಡೆಯಲು ಬೆರಳು ಒತ್ತಿರುತ್ತಿರಾ ಅಂದರೆ ಅದರ ಅರ್ಥ ನಿಮ್ಮ ಅಷ್ಟು ಆಧಾರ್ ಮಾಹಿತಿಯನ್ನು ಅವರು ಬಳಸಿಕೊಳ್ಳಲು ಒಪ್ಪಿಗೆ ನೀಡುತ್ತಿದ್ದಿರಾ ಎಂದು ಅರ್ಥ.

ಇದರಿಂದ ಕಂಪೆನಿಗೆ ಮುಖ್ಯವಾಗಿ ಎರಡು ಲಾಭ. ಒಂದು - ಅದು ಕಡಿಮೆ ವೆಚ್ಚದಲ್ಲಿ ದೇಶದ ಶೇ 60ರಷ್ಟು ಜನರ ಆಧಾರ್ ಮಾಹಿತಿಯನ್ನು ಅವರ ಒಪ್ಪಿಗೆಯಿಂದಲೇ ಪಡೆದಿದೆ. ಇದನ್ನು ಅವರು ವೈಯಕ್ತಿಕವಾಗಿ ಪಡೆಯಬೇಕಿದ್ದರೆ ಅವರು ಲಕ್ಷಾಂತರ ಕೋಟಿ ವ್ಯಯಿಸಬೇಕಿತ್ತು ( ಆಧಾರ್ ಮಾಹಿತಿ ಖಾಸಗಿ ಕಂಪೆನಿಗಳೊಂದಿಗೆ ಹಂಚಿಕೊಳ್ಳುವ ಅಧಿಕಾರ ಸರ್ಕಾರಕ್ಕೆ ಇಲ್ಲ ಎಂದು ಸುಪ್ರಿಂ ಕೊರ್ಟ್ ತೀರ್ಪಿತ್ತ ಮೇಲೆ ಜಿಯೊ ಯೋಜನೆ ಆರಂಭವಾಗಿದ್ದು). ಆದರೆ ರಿಲಯನ್ಸ್’ನವರು ಫ್ರೀ ಡೇಟಾದ ಹೆಸರಿನಲ್ಲಿ ಅವರು ನಿಮ್ಮ ಆಧಾರ್ ಮಾಹಿತಿ ಎತ್ತಿದರು. ( ಸರ್ಕಾರ ಬೇರೆ ಎಲ್ಲಾ ಮೊಭೈಲ್ ಸೇವಾ ಕಂಪೆನಿಗಳು ನಾನು ಕೊಟ್ಟಿರುವ ಯಾವುದಾದರೂ ಗುರುತಿನ ಪತ್ರ ಪಡೆಯುತ್ತಿರುವಾಗ ನೀವು ಯಾಕೆ ಆಧಾರ್ ಪಡೆಯುತ್ತಿದ್ದಿರಾ ಎಂದು ಕೇಳಲಿಲ್ಲ? ಏಕೆಂದರೆ ಇಂದು ರಿಲಾಯನ್ಸ್ ಮತ್ತು ಸರ್ಕಾರ ಒಂದೆ ಎಂಬ ಮಾತಿದೆ. ಹೋಗಲಿ ನಾವೂ ಸಹ ಕೇಳಲಿಲ್ಲ ಆ ಪ್ರಶ್ನೆ! ಬಿಡಿ… ಫ್ರೀ ಅಂದ ತಕ್ಷಣ ತಾವು ಲಾಜಿಕ್ ಯೋಚಿಸುವುದಿಲ್ಲ)

ಹೀಗೆ ರಿಲಯನ್ಸ್ ಕಂಪೆನಿ ಈ ಆರು ತಿಂಗಳು ನೀಡಿರುವ ಫ್ರಿ ಡೇಟಾ ಬಳಸಿಕೊಂಡು ನೀವು ಅಂತರ್ಜಾಲದಲ್ಲಿ ಮಾಡಿರುವ ಹುಡುಕಾಟದಲ್ಲಿ ನಿಮ್ಮ ಮಾರುಕಟ್ಟೆಯ ನಡವಳಿಕೆಗಳು ಏನು? ಕೊಳ್ಳುವ ಆಸಕ್ತಿ ಯಾವುದರಲ್ಲಿ ಇದೆ ಎಂಬ ಡೇಟಾ ಬೇಸ್ ರೆಡಿ ಮಾಡಿಕೊಂಡಿದೆ. ಅದು ಜಿಲ್ಲಾವಾರು/ತಾಲ್ಲೂಕುವಾರು/ರಾಜ್ಯವಾರು/ನಗರವಾರು ಆಧಾರ್ ಮಾಹಿತಿಯೊಂದಿಗೆ ಅವರಲ್ಲಿ ಲಭ್ಯವಿದೆ. ಈ ಮಾಹಿತಿಯನ್ನು ಅವರು ಎಫ್.ಡಿ.ಐ( ಚಿಲ್ಲರೆ ವ್ಯಪಾರದಲ್ಲಿ ವಿದೇಶಿ ಹೂಡಿಕೆ) ಸಂಸ್ಥೆಗೆ ಮಾರುತ್ತಾರೆ. ಎಷ್ಟಿದ್ದರೂ ಈ ಕಾಲದಲ್ಲಿ ಇನಫರ್ಮೇಷನ್ ಈಸ್ ವೆಲ್ತ್ ಅಲ್ಲವೆ!

 

ಮತ್ತೊಂದು ಲಾಭ ದೇಶದ ಬಹುದೊಡ್ಡ ಜನರನ್ನು ಒಂದು ನೇಟ್ ವರ್ಕ್ ಅಡಿ ತಂದದ್ದರಿಂದ ಇಷ್ಟು ದಿನದಲ್ಲಿ ಆ ದೊಡ್ಡ ಜನರ ಆಸೆ/ಆಕಾಂಕ್ಷೆಗಳು ಏನು ಎಂಬ ಕುರಿತು ದೊಡ್ಡ ಅಧ್ಯಯನ ಮಾಡಿ ಮಾಹಿತಿ ಸಂಗ್ರಹಿಸಿ ಅವುಗಳನ್ನು ಚುನಾವಣಾ ಪೂರ್ವ ಪ್ರಾಪಗಂಡಾಕ್ಕೆ ಬಳಸಿಕೊಳ್ಳುತ್ತವೆ. ಇದರ ಹಿಂದೆ ಇಷ್ಟೆಲ್ಲಾ (ಕು)ತರ್ಕಗಳಿವೆ.  ನಾವು ಬೆರಳು ಒತ್ತಿ ಫ್ರೀ ಡೇಟಾ ಅನುಭವಿಸುತ್ತಿದ್ದೇವೆ ಎಂಬ ಖುಷಿಯಲ್ಲಿ ಇದ್ದೇವೆ. ಅಲ್ಲಿ ದೊಡ್ಡ ತಂಡ ನಮ್ಮ ಇಂಚಿಂಚು ಹುಡುಕಾಟವನ್ನು ದಾಖಲಿಸುತ್ತಾ ಡಾಟಬೇಸ್ ರೆಡಿಮಾಡಿಕೊಳ್ಳುತ್ತಿದೆ. 

ಖಾಸಗಿತನದ ಹಕ್ಕು ಕಸಿದಿರುವುದಕ್ಕೆ ಇಷ್ಟು ಪುರಾವೆ ಸಾಲದೇ?