ಬೇಡವೆಂದರೂ ಬಿಡದೀ ಮಾಯೆ..13
----- ----- -----
ಸಂವಹನ ಕಲೆ ಮತ್ತು ಆಂಗಿಕ (ದೇಹ) ಭಾಷೆ,ಈ ವಿಷಯಗಳ ಬಗ್ಗೆ ಹದಿಹರೆಯದ ಜನ ವಿಶೇಷ ಒತ್ತು ನೀಡುವ ಅಗತ್ಯವಿದೆ.ಪೋಷಕರೂ ಸಹ ಈ ನಿಟ್ಟಿನಲ್ಲಿ ಗಮನ ಕೊಡಬೇಕಾಗಿದೆ.
ಸಂವಹನ ಕಲೆ (communication skill) ,ಆಂಗಿಕ ಭಾಷೆ (body language) ಇವತ್ತಿನ ಸ್ಪರ್ಧಾ ಪ್ರಪಂಚದಲ್ಲಿ ಅತ್ಯಾವಶ್ಯಕ ’ಹತ್ಯಾರ್’ ಗಳಾಗಿವೆ.
ಅದನ್ನು ಹದಿಹರೆಯದಲ್ಲೇ ರೂಢಿಸಿಕೊಳ್ಳುವ ಬಗ್ಗೆ ಪ್ರಯತ್ನವೂ ಅವಶ್ಯಕ.
ಇಂದಿನ ತಂತ್ರಜ್ಞಾನ ಮತ್ತು ವಿಜ್ಞಾನ ಯುಗದಲ್ಲಿ ಹೆಚ್ಚು ಪಾತ್ರ ವಹಿಸುವುದು ಸಂವಹನವಾಗಿದೆ. ಸಂವಹನವು ನಮ್ಮ ಜೀವನ ಶೈಲಿಗೆ ತೀರಾ ಅತ್ಯಗತ್ಯವೂ ಹೌದು. ಉತ್ತಮ ಸಂವಹನ ಕೌಶಲ್ಯವು ಸಮಾಜದಲ್ಲಿ ನಮಗೆ ಒಳ್ಳೆಯ ಬೆಲೆಯನ್ನು ತಂದುಕೊಡುತ್ತದೆ.
ಮಾತು ಬಲ್ಲವನಿಗೆ ಜಗಳವಿಲ್ಲ ಎಂಬಂತೆ ಉತ್ತಮ ಸಂವಹನವು ಸಮಾಜದಲ್ಲಿ ನಮ್ಮ ಬೆಲೆಯನ್ನು ಎತ್ತಿ ತೋರಿಸುತ್ತದೆ. ಆದರೆ ತಮ್ಮಲ್ಲಿ ಉತ್ತಮ ಸಂವಹನ ಕೌಶಲ್ಯವಿಲ್ಲ ಎಂದು ಕೊರಗುವವರು ಕೀಳರಿಮೆಗೆ ಗುರಿಯಾಗದೇ ಇರುವುದಿಲ್ಲ.ಈ ಸಂದರ್ಭದಲ್ಲಿ ನಮ್ಮಲ್ಲಿನ ಮಾತಿನ ಕೌಶಲ್ಯವನ್ನು ಸಾಣೆ ಹಿಡಿಯುವುದು ಹೇಗೆಂಬುದು ನಮಗೆ ತಿಳಿದಿರಬೇಕು. ನಿಮ್ಮ ಸಂವಹನ ಸುಧಾರಣೆಯಾದಲ್ಲಿ ಮಾತ್ರವೇ ಅವಕಾಶದ ಬಾಗಿಲು ತೆರೆದುಕೊಳ್ಳುತ್ತದೆ ಮತ್ತು ನಿಮ್ಮ ಗುರಿ ನಿಮಗೆ ಕಾಣುತ್ತದೆ.
ನಿಮ್ಮ ಸಂವಹನ ಮೌಲ್ಯವನ್ನು ಸುಧಾರಿಸಿಕೊಳ್ಳಲು ನೀವು ಉತ್ತಮ ಆಲಿಸುವವರಾಗಿರುವುದು ಅತೀ ಅಗತ್ಯವಾಗಿದೆ. ಇದರಿಂದ ನಿಮ್ಮ ಸುತ್ತಲಿನ ಜನರಿಂದ ಕೆಲವೊಂದನ್ನು ತಿಳಿದುಕೊಂಡಂತೆ ಆಗುತ್ತದೆ. ಆದಷ್ಟು ನಿಮ್ಮ ಕಿವಿಯನ್ನು ತೆರೆದಿಟ್ಟುಕೊಳ್ಳಿ. ನೀವು ನಿಮ್ಮ ಸುತ್ತಲಿನ ಜನರಿಂದ ಹೆಚ್ಚು ಆಲಿಸಿದಂತೆ ನಿಮ್ಮೊಳಗಿನ ಮಾತುಗಾರ ಬೆಳೆಯುತ್ತಾನೆ.
ಕಣ್ಣಿನ ಸಂಪರ್ಕವು ನಿಮ್ಮ ಸಂವಹನ ಭಾಷೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಆಂಗಿಕ ಭಾಷೆ ನಂತರ ಬರುತ್ತದೆ.ಇದು ನಿಮ್ಮ ಸಂವಹನದ ಮಟ್ಟವನ್ನು ಮತ್ತು
ಆತ್ಮ ವಿಶ್ವಾಸವನ್ನು ದೃಢಪಡಿಸುತ್ತದೆ. ಈ ಆಂಗಿಕ ಭಾಷೆ ಸಂವಹನದಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ನಿಮ್ಮ ಕೈಗಳನ್ನು ಅತ್ತಿತ್ತ ಚಲಿಸುತ್ತಾ ಮುಕ್ತವಾಗಿ ಮಾತನಾಡಿ.
ನಿಮ್ಮ ಭಾಷೆಯ ಕೌಶಲ್ಯವನ್ನು ಸುಧಾರಿಸುವುದು ನಿಮ್ಮೆಲ್ಲಾ ಸಂವಹನದ ಪ್ರಗತಿಗೆ ಅತಿ ಮುಖ್ಯವಾಗಿದೆ. ಸಂವಹನದಲ್ಲಿ ವ್ಯಾಕರಣ ಪ್ರಮುಖವಾಗಿದೆ. ನಿಮ್ಮ ವ್ಯಾಕರಣ ಸರಿಯಾಗುವವರೆಗೆ ನಿಮ್ಮ ಪ್ರಯತ್ನವನ್ನು ಬಿಡಬಾರದು. ಇದು ನಿಮ್ಮ ಪರಿಣಾಮಕಾರಿ ಸಂವಹನಕ್ಕೆ ಅತೀ ಅಗತ್ಯವಾಗಿದೆ.
ಓದುವಿಕೆ ಅತೀ ಮುಖ್ಯವಾಗಿದೆ. ನಿಮ್ಮ ಭಾಷಾ ಕೌಶಲ್ಯವನ್ನು ಸುಧಾರಿಸಲು ಇದು ಪರಿಣಾಮಕಾರಿ. ಸುದ್ದಿಪತ್ರಿಕೆಯನ್ನು, ಪುಸ್ತಕಗಳನ್ನು ಓದುವುದು ನಿಮ್ಮ ವ್ಯಾಕರಣವನ್ನು ಪದಗಳ ಉಚ್ಛಾರಣೆಯನ್ನು ಸುಧಾರಿಸಲು ಸಹಾಯಕಾರಿಯಾಗಿದೆ.
ಕನ್ನಡಿ-ಈ ಅಂಶ ನಿಮ್ಮ ಸಂವಹನ ಕೌಶಲ್ಯವನ್ನು ಸುಧಾರಿಸುವುದು ಖಂಡಿತ. ಕನ್ನಡಿಯ ಎದುರು ಸ್ವಲ್ಪ ಹೊತ್ತು ನಿಂತು ಪ್ರಯತ್ನಿಸಿ. ನೀವು ಕನ್ನಡಿಯ ಎದುರು ನಿಂತಾಗ ನಿಮ್ಮನ್ನು ನೀವು ಕಾಣಬಹುದು. ಇದು ನಿಮ್ಮ ಮುಖದ ಭಾವನೆಗಳನ್ನು ನೋಡಲು ಮತ್ತು ಆಂಗಿಕ ಭಾಷೆಯನ್ನು ಗಮನಿಸಲು ಅತೀ ಅಗತ್ಯವಾಗಿದೆ.
ಕೊನೆಯದಾಗಿ ಸಂವಹನ ಕೌಶಲ್ಯವನ್ನು ಸುಧಾರಿಸಲು ಜ್ಞಾನ ಅತೀ ಅಗತ್ಯವಾಗಿದೆ. ನಿಮ್ಮಲ್ಲಿ ಅತ್ಯುತ್ತಮ ಜ್ಞಾನ ಇದೆ ಎಂದಾದರೆ ಸಂವಹನವನ್ನು ಸುಧಾರಿಸುವಲ್ಲಿ ಯಾವುದೆ ತೊಂದರೆ ಆಗುವುದಿಲ್ಲ.
ಅಂಕಿ-ಅಂಶ;- ದೇಹ ಭಾಷೆಯ ಅಂಶಗಳಾದ ನಿಲವು,ಭಂಗಿ, ಆಂಗಿಕ ಸನ್ನೆಗಳು ಮತ್ತು ಕಣ್ಣ ಸಂಪರ್ಕದಿಂದ 55%ರಷ್ಟು ಸಂವಹನವನ್ನು ನಿರ್ಧರಿಸಬಹುದು,
ಧ್ವನಿಯ ಮಟ್ಟದ ಮೂಲಕ 38%ರಷ್ಟು ಮತ್ತು
ಸಂವಹನ ಪ್ರಕ್ರಿಯೆಯಲ್ಲಿ ಬಳಸಿದ ವಿಷಯ ಅಥವಾ ಪದಗಳಿಂದ 7%ರಷ್ಟನ್ನು ನಿರ್ಧರಿಸಬಹುದು.
#ವರ್ತಮಾನ -ಮುಂದೆ ತಾರುಣ್ಯದಲ್ಲಿ ಇದಕ್ಕಾಗಿ ಹಣ ಮತ್ತು ಸಮಯ ವ್ಯಯಿಸುವ
ಬದಲು ಹದಿಹರೆಯದಲ್ಲಿ ಈ ಬಗ್ಗೆ ಗಮನ ಹರಿಸಲು ಮಕ್ಕಳಿಗೆ, ಪೋಷಕರು ಉತ್ತೇಜಿಸಿದಲ್ಲಿ ಉತ್ತಮ ಫಲಿತಾಂಶ ನಿಶ್ಚಿತ.
* * *
ಮುಂದುವರೆಯುವುದು....
-ಡಾ.ಅಜಿತ್ ಹರೀಶಿ.
